В Бресте к выборам учителям повысили зарплату на 20%
Настаўнікам з Брэста павышаюць заробак. Гэта вынікае з пастановы загадчыцы аддзела адукацыі адміністрацыі Ленінскага раёна Брэста ад 1 верасня.
Павышэнне тлумачаць "дадатковай мерай стымуляцыі працы". І звязваюць яго з дэкрэтам кіраўніка краіны за 1999 год "Аб дадатковых мерах па ўдасканальванні працоўных адносінаў".
Павышэнне тарыфнай стаўкі да 50% кранецца усіх педагагічных супрацоўнікаў, бібліятэкараў, намеснікаў кіраўнікоў устаноў адукацыі і кіраўнікоў вучэбна-спартовых устаноў.
"Прыкладна на 17-20% цяпер вырастуць заробкі ў настаўнікаў", — тлумачаць у бухгалтэрыі аддзела адукацыі. З чым звязанае такое павышэнне, тут не тлумачаць.
Настаўнікі ў такую удачу вераць слаба: заробак даўно ніхто не падымаў, ніхто не папярэджваў, толькі абвестку павесілі. Пакуль ім налічылі адпускныя, без павышэння.
"Два дні таму павесілі такую абвестку на дошцы, з гэтым прыказам. Мы спачатку не паверылі, бо ніякага сходу на гэты конт ці тлумачэнняў не было. Нічога не казалі па тэлевізары і радыё. Пакуль нам далі толькі аванс пасля адпачынку, таму па грошах гэта не адчулі", — расказвае настаўніца з Брэста Алена.
Яе апошні заробак — 3,5 мільёна. Наступны, калі павысяць, будзе ў пачатку кастрычніка.
Цікавімся: ці не павысілі заробак настаўнікам у іншых рэгіёнах. У Віцебску павышэння пакуль не было і не плануецца, запэўніваюць у аддзеле адукацыі Віцебскага гарвыканкама.
Нічога не ведаюць пра павышэнне сталічныя настаўнікі. Заробак апошні раз падымалі больш за год таму, адразу адказвае настаўнік з Мінска Максім:
"З мінулага года нічога не павысілася. На колькі тады, ужо і не памятаю. Пасля толькі тарыфную стаўку там мянялі, але гэта 50 тысяч у дадатак".
Мясцовыя ўлады могуць павысіць заробак самастойна, тлумачаць у Мінадукацыі, без цэнтралізаванага рашэння. Гэта дазваляе дэкрэт кіраўніка краіны.
"Мясцовыя органы ўлады прымаюць такія рашэнні па ўсёй краіне, у залежнасці ад сітуацыі, у розны час", — кажуць у Мінадукацыі.
У сярэднім за жнівень настаўнікі зарабілі 5,5 мільёна, паведамляе Белстат, агульны заробак у адукацыі 4,6 мільёна.
Фота: calend.ru
