Акцыя на Дзень св. Валянціна ў Мінску (on-line)

14 лютага ў Мінску прайшла моладзевая акцыя, прымеркаваная да Дня ўсіх закаханых. Яе арганізавала незарэгістраваная арганізацыя «Малады фронт». Мінскія ўлады не далі дазволу на яе правядзенне. Нашыя карэспандэнты перадавалі паведамленні з месца падзеяў.

У 17:30 на плошчы па-ранейшаму былі толькі 3—4 супрацоўнікі спецслужбаў. Яны спынілі нашага карэспандэнта недалёка ад Ратушы. Чалавек у цывільным сказаў, што далей ісці нельга. Патлумачыць прычыны адмовіўся.

***

17:50. Наш карэспандэнт паведамляе, што плошча Свабоды ачэпленая дзесяткамі людзей у чорным. На іх уніформе няма апазнавальных знакаў. Каля 30 чалавек у цывільным хаваюцца за Ратушай, некалькі дзяжураць каля касцёла — запланаванага месца збору ўдзельнікаў акцыі.

***

Паводле інфармацыі сайту nn.by, яшчэ за некалькі гадзін да пачатку акцыі пачаліся прэвентыўныя затрыманні моладзевых актывістаў. Ва ўласнай кватэры затрымалі аднаго з кіраўнікоў «Маладога фронту» Сержука Лісічонка. На вуліцы схапілі актывістку Людмілу Атакулаву.

Яшчэ а 16-й гадзіне на плошчы Якуба Коласа была разагнаная акцыя “Моладзі БНФ”. Па розных звестках, міліцыянты затрымалі ад 6 да 10 чалавек.

***

18:05. На ходніках недалёка ад ратушы з'явіліся 5 дзяўчынак. Яны апранутыя ў белыя хусткі, на іх вопратцы — чырвоныя сэрцы. Дзяўчынкі раздаюць мінакам кветкі. Натоўп з некалькіх дзесяткаў чалавек у атачэнні журналістаў і супрацоўнікаў спецслужбаў затрымаўся каля Ратушы.

18:15. Натоўп прыблізна з 40 чалавек стаіць на прыступках каля Ратушы. З'явілася расцяжка «Малады фронт». Побач знаходзяцца людзі ў чорным.

18:25. Дзве дзяўчынкі, апранутыя па-святочнаму, зайшлі ў будынак французскай амбасады. Яны маюць намер павіншаваць дыпламатаў са святам Валянціна. Некалькі дзесяткаў чалавек чакаюць іх вяртання каля будынка.

Моладзь скандзіруе «Жыве Беларусь!». Наш карэспандэнт заўважыў аўтобус з танаваным шклом, які знаходзіцца недалёка ад месца падзеяў. Сярод дэманстрантаў прысутнічае Аляксандр Мілінкевіч з жонкай Інай Кулей.

18:40. Дзяўчынкі выйшлі з будынка французскай амбасады. Каля 60-70 удзельнікаў акцыі збіраюцца працягнуць шэсце па ходніках.

Яны ўзнялі тры сцягі — бел-чырвона-белы, Еўрасаюза і Маладога фронту. Моладзь скандзіруе: «Жыве Беларусь!» Калона рушыла ў бок амбасады Нямеччыны.

***

18:50. Калона прыблізна з 100 чалавек ідзе па ходніках да перакрыжавання праспекта Незалежнасці і вуліцы Леніна. За ёй марудна едзе аўтобус з спецназам.Людзі ў цывільным спрабавалі схапіць аднаго з дэманстрантаў, але яго ўдалося адбіць.

18:55. Калона ідзе па Кастрычніцкай плошчы. Колькасць дэманстрантаў усё большае.

19:00. 100—120 дэманстрантаў ідуць па праспекце ў бок плошчы Перамогі. Па некаторых звестках, затрымана 5 чалавек, сярод іх моладзевы актывіст Барыс Гарэцкі.

19.10. Калона наблізілася да плошчы Перамогі. Дэманстранты скандзіруюць: "Жыве Беларусь!", "Верым, можам, пераможам!", "Беларусь — у Еўропу!". Людзі ў цывільным толькі што захапілі сцяг "Маладога фронту".

19.20. Дэманстранты дайшлі да амбасады Нямеччыны на вуліцы Захарава. Супрацоўнікам амбасады дэманстранты ўручаюць кветкі, "валянцінкі" і чытаюць зварот з нагоды свята.

***

19.35. Калона рушыла ў бок амерыканскай амбасады. Стала вядома, што насамрэч затрыманы адзін чалавек — Барыс Гарэцкі. Яго схапілі каля вуліцы Янкі Купалы.

19.50. Калона дэманстрантаў у колькасці каля 80 чалавек зараз ідзе па ходніках вуліцы Кісялёва. Яна кіруецца да амерыканскай амбасады.

20.05. Дэманстранты знаходзяцца каля амерыканскай амбасады, размаўляюць з намеснікам амбасадара, які выйшаў да іх. Чакаецца, што на гэтым акцыя з нагоды Дня св. Валянціна будзе скончаная.

***

20.10. Дэманстранты групамі разыходзяцца. Акцыя скончаная. Падчас яе правядзення былі затрыманы два чалавекі — Барыс Гарэцкі і Сяржук Гумінскі. Паводле інфармацыі сайта nn.by, неўзабаве яны былі выпушчаныя. На волі знаходзяцца і затрыманыя сёння актывісты "Моладзі БНФ".