Аўтар фота з “Пагоняй” вярнуўся ў вучэльню
Пасля гучнага скандалу на вучобу ў Ястрамбельскую кадэцкую вучэльню вярнуўся аўтар фота з “Пагоняй” Мікіта Гвоздзеў.
Пра гэта “Нашай Ніве” паведамілі ягоныя аднакласнікі. Мікіта Гвоздзеў (на фота другі справа) вярнуўся ў кадэцкую вучэльню пасля гучнага скандалу, калі ён разам з сябрамі-аднакурснікамі сфатаграфаваўся ў цішотцы з гербам “Пагоня”.
Адразу пасля публікацыі гэтага фота ў СМІ паведамлялася, што Мікіту адлічылі, і бацькі забралі яго дадому.
Магчыма, так яно і было, аднак пасля рэзанансу, які пракаціўся па краіне, дырэктар кадэцкай вучэльні ў Ястрамбелі прынёс прабачэнні хлопцу і папрасіў яго вярнуцца.
І вось, як кажуць аднакласнікі Мікіты, ён вярнуўся яшчэ ў мінулую нядзелю, як толькі скончыліся восеньскія вакацыі.
“Усё спакойна”, — падкрэслілі аднакласнікі хлопца.
Фота: з сацыяльных сетак
