Брэсцкія ўлады дазволілі фэст "100 год БНР"

Брэсцкі гарвыканкам ухваліў заяўку на правядзенне 25 сакавіка святочнага фэсту "100 год БНР", але перанёс мерапрыемства на іншую пляцоўку, перадае Радыё "Свабода".

Святочны фэст пачнецца а 13-й гадзіне на плошчы Свабоды. Спярша пройдзе паўгадзінны мітынг, на якім выступяць палітычныя і грамадскія актывісты горада, а таксама прадстаўнікі брэсцкіх уладаў, кажа адзін з заяўнікаў акцыі кіраўнік Брэсцкай арганізацыі БНФ Зміцер Шыманскі.

Чыноўнікі дазволілі прыносіць на Дзеь Волі бел-чырвона-белыя сцягі і герб "Пагоня" разам з іншай сімволікай, "тэматычна звязанай з адзначаемай падзеяй".

У музычнай частцы фэсту выступяць духавы аркестр Брэста, а потым пройдзе рок-канцэрт. Дакладна вядома, што згоду на ўдзел далі гурты :B:N:, Re1ikt, Zolki Band.

На фэсце, які працягнецца да 17-й гадзіны, будуць працаваць сувенірны кірмаш, фатазоны і дзіцячыя пляцоўкі. Паралельна з музычнай пляцоўкай будуць праходзіць майстар-класы рамесьнікаў, а рэканструктарскія клюбы адновяць эпоху Беларускай Народнай Рэспублікі. 

Раней стала вядома, што гарадскія ўлады далі дазвол на святкаванне 100-годдзя БНР у Мінску і Гродне.