"ДНР" страціла забітымі і параненымі больш за палову сваіх байцоў

Самаабвешчаная "ДНР" страціла забітымі і параненымі больш за палову сваіх байцоў (да 55%), якія былі ў яе на пачатак вайны. Пра гэта сведчыць новы даклад брытанскай ваеннай разведкі. У ім былі выкарыстаны ў тым ліку і даныя, якія публікуюцца ўладамі "ДНР".

У дакладзе адзначаецца, што ў баях з украінскімі войскамі ў Данецкай вобласці цяжкія страты панеслі і расійскія войскі. Брытанская разведка лічыць, што Расія, нягледзячы на гэта, збіраецца задзейнічаць у баях на Данбасе значную колькасць рэзервовых частак.

Падобная сітуацыя і ў так званай "ЛНР". Яе падраздзяленні таксама панеслі цяжкія страты. Вядома, што каб іх папоўніць, прымусова мабілізуюцца грамадзянскія асобы, нават студэнты і выкладчыкі ВНУ. Яшчэ вясной гаворка ішла пра "татальную мабілізацыю" ў Данецку і Луганску.