Дзе патусіць на выхадных 31 студзеня – 2 лютага, раіць Саша Варламаў

Саша Варламаў даволі часта наведвае розныя культурна-масавыя мерапрыемствы. Галоўнае, каб яны не перасякаліся з працай для блога на Lady.tut.by, якой апошнім часам у мадэльера вельмі шмат. Ну, і ў начных клубах Саша рэдкі госьць, бо лічыць іх усе “абсалютна аднолькавымі”.

Днямі Саша Варламаў са сваёй пляменніцай схадзіў у кінатэатр на новую экранізацыю аповесці Гогаля “Вій”. Менавіта з-за таго, што гэтая стужка цяпер ідзе паўсюль, ніякіх кінематаграфічных парад знакаміты мадэльер вырашыў не рабіць.

“Гэта пародыя на кіно ўвогуле, проста ціхі жах, — каментуе фільм “Вій” Варламаў. — Уся нелюбоў Расіі да Украіны ў гэтай стужцы паказаная. Там украінцы такім дурнямі выглядаюць, што пасля прагляду мне нават захацелася пайсці зубы пачысціць. А мая пляменніца ў захапленні! Але гэта зразумела — юнае пакаленне!”

У пятніцу мадэльер прапануе наведаць Філармонію, бо там з “Шэдэўрамі венскай класікі” выступіць Дзяржаўны акадэмічны сімфанічны аркестр РБ.

“Яны выступаюць рэдка, але заўсёды гэта вельмі прыгожая добрая музыка, і гэта вельмі моцны калектыў”, — дадае Саша.

Як варыянт на суботні вечар — “Дабрачынны зімовы баль” у клубе Blackhall. Усе сабраныя сродкі пойдуць на неабходнае тэрміновае лячэнне чатырохгадовай Каці Удавухінай. Выступяць на балі гурты “Тяни-Толкай”, “Дядя Ваня”, “Аура”, “Дрозды”, Ларыса Грыбалёва, Аляксандр Ціхановіч ды іншыя. На думку мадэльера, гэта нядрэнны варыянт адпачыць і адначасова дапамагчы.

“Я, праўда, сам не бачыў, але калі ўжо “Рамэа і Джульета” Шэкспіра ідзе ў Драмтэатры беларускай арміі, то ў любым выпадку, там ёсць Шэкспір, — працягвае складаць суботнія планы мадэльер. — Я не ведаю, як яны будуць там граць, не магу ні ацаніць, ні сказаць, але мне падаецца, што Шэкспір нават у войску Шэкспір”.

А вось у нядзелю давядзецца выбіраць. Саша Варламаў бяспройгрышным лічыць паход у Малую залу імя Г.Шырмы, дзе будзе выступаць “Мінскі струнны квартэт” з праграмай “Дарогамі Германіі разам з Іаганам Себасцянам Бахам”. У той жа час (19:00) у “Вялікім тэатры оперы і балета” будуць паказваць “Алека, Балеро”.

“Пра “Алека” нічога сказаць не магу, бо, на мой погляд, нічога цікавага не ўяўляе. А вось “Балеро” Равэля я бы паглядзеў з вялікім задавальненнем. Я вельмі люблю, па-першае, творы Марыса Равэля, а па-другое, пастаноўкі Валянціна Елізар’ева. Роўнага гэтаму чалавеку ў Беларусі няма, і не думаю, што бліжэйшым часам будзе. Таму ўсё, што цяпер пры ім ідзе, трэба глядзець”.

Апроч таго, у любы дзень выхадных 31 снежня-2 лютага Саша Варламаў раіць наведаць выставу Ганы Балаш “Мадэль Ані”. За больш чым 20-гадовую гісторыю знаёмства з мастачкай мадэльер пераканаўся, што ўсе яе працы — вартыя ўвагі і захаплення. Галоўнае, наведаць “Музей сучаснага выяўленчага мастацтва” менавіта ў гэты week end, бо ў ўжо ў панядзелак выстава завяршыцца.

Ну, і як дадатак, Саша Варламаў раіць сачыць за экспазіцыямі Акадэміі мастацтваў, канцэртамі ў Кансерваторыі ды выступамі вакальнага ансамбля “Класік-Авангард” — тое, што мадэльер сам з задавальненнем наведвае.