Эксперт: БАТЭ зноў можа згуляць з "Барселонай" другім складам
Каментатар Васіль Уткін негатыўна выказаўся пра трэнера БАТЭ Ганчарэнку. Пра гэта разважае вядоўца праграмы "Час футболу" на тэлеканале "Лад" Мікалай Хадасевіч.
"Галоўны трэнер БАТЭ Віктар Ганчарэнка павінен пры жыцці гарэць у пекле. Ён вырашыў, што яго клубу няма чаго лавіць у матчы з “Барселонай” і выставіў моладзь. Гэта Ліга чэмпіёнаў, бульбяная твая душа. Ты, БАТЭ, патрапіў у Лігу чэмпіёнаў і пачынаеш у ёй кагосьці “абкатваць”?! Хто табе дазволіў?! Хто ты ўвогуле такі?! “Барса” выстаўляе першы склад, а БАТЭ некага там беражэ. “Барселона” іграе, а БАТЭ думае: “У нас у наступным туры вырашальная ігра з “Бульбачысткай” з Віцебска ці “Тарпеда” з Жодзіна. Яны думаюць, што Ліга чэмпіёнаў — школа. Хлопцы, гэта не школа. Гэта вышэйшы узровень. Ці гуляйце, ці ідзіце варыце лебяду і гатуйце крамбамбулю", — сказаў Васіль Уткін у эфіры радыё “Эхо Москвы”.
Пракаментаваць гэта выказванне мы папрасілі вядомага беларускага спартовага журналіста Мікалая Хадасевіча.
Еўрарадыё: Расійскі спартовы аглядальнік Васіль Уткін вельмі негатыўна выказаўся пра галоўнага трэнера БАТЭ Віктара Ганчарэнку. Нават назваў яго "таннай душонкаю". Ці сапраўды расійскі каментатар мае рацыю і Ганчарэнка насамрэч “абкатвае” навічкоў?
Мікалай Хадасевіч: Гэта досыць моцнае эмацыянальная выказванне, і яно, на мой погляд, не адлюстроўвае таго, што здарылася. Віктар Ганчарэнка выставіў на той момант аптымальны склад супраць "Барселоны". І ў Беларусі гучалі такія ж абвінавачванні, што выйшлі на поле маладыя спартсмэны, навічкі, як бы мовіць. Але ж я лічу, што такі "эмацыйны выхлап" з боку расійскага каментатара — недарэчны. Ганчарэнка выпусціў на поле маладых гульцоў, таму што і так было ясна, што БАТЭ прайграе. Але яму было важна, каб маладыя гульцы адчулі, што такое "Барселона", каб паспрабавалі гульню з такім вядомы клубам. Кожны клуб вырашае свае задачы ў кожным канкрэтным матчы, і каментаваць, не ведаючы гэтых канкрэтных задачаў, не мае сэнсу. Таму я негатыўна, але і спакойна паставіўся да таго, што сказаў спадар Уткін.
Еўрарадыё: БАТЭ да ліку 0:4 гуляла ў асноўным складзе, і толькі потым на замену выйшлі маладыя з запаснога складу. Пры самым канцы. Можа, у спадара Уткіна зайздрасць была, што БАТЭ, беларускі клуб, гуляе ў Лізе чэмпіёнаў, а не расійскі клуб? Што маем магчымасць "абкатаць" і навічкоў…
Мікалай Хадасевіч: Вы ведаеце, вельмі сумна было глядзець гульню, бо БАТЭ не хапала агрэсіі, і таму гульня атрымалася маркотнай. І нават сярод аглядальнікаў было такое меркаванне, што БАТЭ не павінна ўдзельнічаць у такім турніры, як ліга чэмпіёнаў. Але я лічу, што гэта вельмі прыватная справа спадара Ганчарэнкі, якая хоць і выклікае асуджэнне, але нічога не мае да класу каманды БАТЭ.
Еўрарадыё: На ваш погляд, якая мусіць быць рэакцыя трэнера БАТЭ Віктара Ганчарэнкі на такія ацэнкі?
Мікалай Хадасевіч: Віктар Міхайлавіч вельмі спакойны чалавек і аб'ектыўна ацэньвае ўсё, што дзеецца ў футболе. І ў яго вельмі слушныя чалавечыя крытэрыі, якіх ён прытрымліваецца. Таму я не лічу, што ён будзе неяк моцна рэагаваць на гэтую ацэнку з боку Уткіна.
Еўрарадыё: У БАТЭ будзе яшчэ адна гульня з "Барселонай". Ці будзе зроблена нейкая праца над памылкамі?
Мікалай Хадасевіч: У снежні, калі адбудзецца другі матч БАТЭ з "Барселонай", нельга выключыць, што Ганчарэнка зноў выставіць другі склад. Справа ў тым, што гэта даволі распаўсюджаная практыка ў еўрапейскіх клубаў, калі яны для вырашэння нейкіх унутраных пытанняў выстаўляюць у кубкавых турнірах другі склад. "Татэнхэм", напрыклад, так робіць. А робіцца гэта для таго, каб вырашыць нейкія пытанні ва ўнутраных чэмпіянатах. Тактычныя, а можа нават стратэгічныя. І ўмешвацца ў рашэнні трэнера не варта. Ён заўсёды лепей ведае, што патрэбна зрабіць, каб каманда была на ўзроўні.
