ЕС выдзяліў 4 млн еўра на стварэнне Інструмента Савета Еўропы

Яго стварэнне мусіць паспрыяць рэформам у краінах Усходняга партнёрства, уключна з Беларуссю. Прыярытэты гэтай ініцыятывы – развіццё дэмакратыі, стабільнасці і эфектыўнага кіравання ў рэгіёне Еўрапейскай палітыкі суседства. Яшчэ адна яе мэта – набліжэнне нормаў і правіл краін-партнёраў да еўрапейскіх стандартаў, паведамляе прэс-служба Прадстаўніцтва Еўрасаюза ў Беларусі. Фінансава падтрымліваць будуць перадусім трэнінгі і семінары з удзелам экспертаў з Савета Еўропы, дадае прэс-служба.

Нагадаем, Беларусь – адзіная з Усходняга партнёрства, якая не ўваходзіць у Савет Еўропы. Беларускі парламент не мае статуса спецыяльнага госця ў Парламенцкай асамблеі гэтай арганізацыі.