Еўрапейцы назвалі "слабыя месцы" беларускага Закона "Аб СМІ"
Еўрапейская федэрацыя журналістаў заклікала беларускія ўлады зладзіць адкрытую дыскусію наконт Закона "Аб сродках масавай інфармацыі".
Адпаведныя лісты сёння накіраваныя ў Адміністрацыю прэзідэнта, парламент, Савет міністраў і Міністэрства інфармацыі.
Удзел у такой дыскусіі плануюць узяць беларускія журналісцкія арганізацыі, якія выкажуць кампетэнтнае меркаванне пра "магчымыя змены, а таксама практыку прымянення" закона, адзначаецца ў лісце.
За два гады дзеяння апошняй рэдакцыі закона выявіліся ягоныя "слабыя месцы і недэмакратычная сутнасць".
Федэрацыя, у прыватнасці, аднесла да "слабых месцаў" дазвольны парадак рэгістрацыі і дадатковыя падставы для папярэджанняў СМІ, неабароненасць журналістаў-фрылансераў, рэгуляванне дзейнасці СМІ у інтэрнэце.
