Філосаф: Беларусы не схільныя да радыкальных ідэяў

120217 AncipenkaS.mp3

Еўрарадыё: Ці беларусы – нацыя добрых людзей?

Анціпенка: Я думаю, што так. У беларусаў ёсць шмат талерантнасці, беларусы – людзі гасцінныя. Гэта адзначае шмат хто, хто бываў у нашай краіне. Гэта адна з праяваў дабрыні. Але, дабрыня перадусім – гэта праява любові. Любові да чалавека, да прыроды, да жывёлаў. Я не буду параўноўваць і не скажу, што беларусы дабрэйшыя за кагосьці, але нашая гісторыя – прынамсі дваццатага стагоддзя – сведчыць, што агрэсіўнасць не была рысай беларускай ментальнасці ў яе гістарычным вымярэнні.

Еўрарадыё: Можа ў нас мала раздражняльнікаў?..

Анціпенка: Ну, я не думаю, што мала было правакацыяў. Я мяркую, што неагрэсіўныя паводзіны – гэта праява механізму самавыжывання беларусаў. Беларусы не любяць быць агрэсіўнымі і не хацелі б правакаваць кагосьці. Таму, што даволі часта ў ХХ стагоддзі беларусы аказваліся ахвярамі. І ўвогуле, сацыялагічныя апытанні паказваюць, што беларусы не схільныя да нейкіх радыкальных ідэяў. Гэта тычыцца розных сфераў.

Еўрарадыё: І палітычнай бадай што таксама...

Анціпенка: Таксама. Відавочна, што беларусы не схільныя да нейкіх палітычных закалотаў.

Еўрарадыё: А ці можна звязваць узровень дабрыні з іншымі паказчыкамі? Напрыклад, з узроўнем развіцця краіны... Ці былі б мы дабрэйшымі, калі б у нас была лепшая эканамічная сітуацыя?

Анціпенка: Такія карэляцыі ёсць, але яны не надта істотныя. Я б хутчэй звязваў з культурніцкай традыцыяй і з гісторыяй. Гісторыя кожнага народа, гэта тая ж біяграфія. Калі ў гісторыі народу дамінуе агрэсіўны стыль паводзінаў, то цяжка сказаць, што гэтаму народу ўласцівая дабрыня. Цяжка сказаць, што імперскія памкненні – выказнік мірных і добрых намераў таго ці іншага народу. У гэтым сэнсе беларусы не дэманстравалі агрэсіўных паводзінаў да іншых народаў. У гэтым сэнсе беларусы – ціхія і мірныя еўрапейцы.