"Горшае наперадзе": генсек НАТА аб вайне ва Украіне
Енс Столтэнберг / ukr.net
Вайна ва Украіне можа зацягнуцца на месяцы і нават гады. Такі прагноз нямецкай газеце Die Welt am Sontag зрабіў генеральны сакратар НАТА Енс Столтэнберг.
Паводле яго слоў, у траўні-чэрвені Украіне варта падрыхтавацца да маштабнага наступу Расіі, большай жорсткасці з боку расійскіх вайскоўцаў, значных страт, разбурэнню інфраструктуры і ўдарам па жылых дамах.
Енс Столтэнберг лічыць, што Украіна можа перамагчы Расію ў вайне, але для гэтага ёй трэба перайсці з савецкай на сучасную зброю заходняга ўзору. Да таго ж украінцы добра матываваныя — яны абараняюць сваю краіну, тады як расіяне адрозніваюцца нізкім баявым духам і недаверам да кіраўніцтва. Столтэнберг упэўнены, што Захад павінен павялічыць пастаўкі цяжкага ўзбраення Украіне, "зрабіць больш і падрыхтавацца да доўгатэрміновых абавязальніцтваў".
Да таго ж, перакананы генеральны сакратар, Паўночнаатлантычны Альянс павінен прыкласці ўсе намаганні, каб вайна не перакінулася з Украіны на іншыя краіны — менавіта па гэтай прычыне НАТА не перакідвае свае войскі на ўкраінскую тэрыторыю.
Акрамя таго, Столтэнберг адзначыў, што ў арганізацыі няма ніякіх звестак, што Расія гатова да ядзернай вайны, нягледзячы на пагрозы Уладзіміра Пуціна.
