J:морс зладзілі свой першы open-air

Летні варыянт "Канцэрту ў тэатры" зладзілі музыканты J:морс на адкрытай пляцоўцы кавярні "U2". Падчас выступу, Уладзімір Пугач прэзентаваў дзве новыя песні — "Беги" і "Дзесьці", да асноўнага складу "Морсаў" далучыліся спецыяльныя госці — вядомы акардэаніст Уладзімір Грама і майстар чароўнай флейты Ігар Ляўчук, Аляксей Зайцаў сыйграў на кантрабасе, а Уладзімір Пазняк — на бубнах. 

Так, з нетыповымі для J:морс інструментамі і свежымі аранжыроўкамі, прагучалі хіты розных гадоў:  "Маё сонца", "Web-дизайн", "Так-цік-так", "Поезд", "Глядзі", "Календарем", "Серая тень", "Мятное лето". Да стандартнай "справаздачы" гэтым разам музыкнты дадалі таксама песню "London Town", якая была напісана Уладзімірам Пугачам разам са Славам Бандарэнкам і увайшла ў рэпертуар гурта "Чехов".

 

Нягледзячы на дождж і кошты — месца за столікам каштавала ад 70 да 100 тысяч — квіткі на канцэрт былі прададзеныя за некалькі дзён, ды і праз танцпляц перад сцэнай было не праціснуцца.

 

 

Імпрэза нагадвала сяброўскую сустрэчу. Уладзімір Пугач размаўляў з гледачамі, жартаваў, распавядаў пра песні і прадстаўляў музыкантаў. А фанаты ў сваю чаргу частавалі гурт напоямі і перадавалі цыдулкі.

"Вы, мабыць, і самі заўважылі змену жанру, — звярнуўся да гледачоў Уладзімір Пугач. — Зараз мы выканаем яшчэ адну песню ў стылі гарадскога шансона. Гэта наша новая кампазіцыя, якая яшчэ ніколі не гучала, і называецца яна "Дзесьці".

 

Як вядома, J:морс зараз актыўна працуе над падрыхтоўкай новага альбома. Музыканты абяцаюць, што ён будзе адрознівацца ад папярэдніх, але пакуль не раскрываюць сакрэтаў. Што ж, Еўрарадыё зычыць музыкам натхнення и чакае новую пласцінку!