КДБ зацікавілася магілёўскім актывістам Паўлам Варашылавым
Супрацоўнікі КДБ шукаюць магілёўскага актывіста грамадзянскай кампаніі “Наш дом” Паўла Варашылава.
Двое супрацоўнікаў спецслужбы сёння раніцай прыходзілі да яго дахаты. Пра гэта паведаміла яму маці.
Павел Варашылаў даведаўся ад маці, што кагэбісты вельмі хочуць з ім пагутарыць. Іх магла зацікавіць яго актыўнасць у часе перадвыбарчай кампаніі — такое меркаванне спадар Варашылаў выказаў у інтэрв’ю Радыё Свабода. Пры гэтым 19 снежня ён не быў на плошчы Незалежнасці ў Мінску, а застаўся ў Магілёве і ўвогуле быў у той дзень на працы.
Сёння ў КДБ дапыталі і магілёўскую праваабаронцу з грамадзянскай кампаніі “Наш дом” Крысціну Шацікаву. Яна была ўдзельніцай акцыі пратэсту ў Мінску 19 снежня, дзе яе і затрымалі.
