"Медуза": Пуцін пачаў рэпрэсіі супраць ФСБ за правал ва Украіне
На трэцім тыдні вайны расійскі прэзідэнт Уладзімір Пуцін пачаў рэпрэсіі супраць ФСБ за правал ва Украіне. Як паведамляе meduza.io, кіраўніцтва так званай 5-й службы ведамства апынулася пад хатнім арыштам (гэта генерал Сяргей Бяседа і яго намеснік) — за нямэтавае выкарыстанне сродкаў і кепскую разведвальную інфармацыю. Афіцыйнага пацверджання гэтым даным няма.
5-я служба — гэта Служба аператыўнай інфармацыі і міжнародных сувязяў ФСБ РФ. Яна, між іншым, займаецца разведвальнымі аперацыямі на тэрыторыі былога СССР. Сярод задач — утрыманне постсавецкіх краін у сферы ўплыву Расіі.
Мяркуецца, што менавіта гэтая служба прадастаўляла Пуціну інфармацыю пра сітуацыю ва Украіне напярэдадні агрэсіі. Цяпер жа ён усвядоміў, што яна не адпавядала сапраўднасці: і пра настроі ўкраінцаў, і пра іх адносіны да Расіі і да сваёй улады, і пра сілу ўкраінскай арміі. Відаць, спецслужбісты проста не хацелі злаваць прэзідэнта РФ і перадавалі яму дакументы з інфармацыяй, якую ён сам хацеў пачуць.
У выніку былы кіраўнік ФСБ Уладзімір Пуцін стаў аб'ектам кпінаў: разведка ў кадравага разведчыка, як высветлілася, працуе кепска. У гэтым ён ужо пераканаўся і сам.
