Мінчук зняў жудаснае відэа ў аўтазаку пасля затрымання

Мінчук Дзяніс Германаў быў затрыманы падчас ланцуга салідарнасці 10 жніўня на праспекце Пераможцаў. Амапаўцы загналі яго ў аўтазак. Пры затрыманні хлопец падняў рукі ўверх, не супраціўляўся, не лаяўся матам, не хапаў нікога за абмундзіраванне.

У аўтазаку ён зняў на відэа тое, што там адбывалася. Калі пасля вызвалення мужчына прыйшоў у ізалятар на Акрэсціна забіраць рэчы, сярод іх пабачыў камеру. Дзяніс уключыў яе дома і пабачыў, што міліцыянты не сцёрлі відэа. 

Відэаролік ён прынёс для публікацыі журналістам партала TUT.by.

У роліку шмат нецэнзурнай лексікі — гэта амапаўцы размаўляюць з затрыманымі. Акрамя мату яны агучваюць пагрозы. Чуваць удары дубінак.

Па словах Германава, самога яго збілі тройчы: падчас затрымання, у аўтазаку і калі прывезлі ў ізалятар. "На Акрэсціна людзі вылі проста, іх білі смяротным боем", — згадвае ён.

Лекава-працоўны прафілакторый у Слуцку, куды затрыманых завезлі пасля ізалятара, ён згадвае цёплым словам у паўнанні з Акрэсціна.

Пасля вызвалення мінчук звярнуўся ў лякарню. У даведцы — дыягназ "падскурная гематома задне-медыяльнай паверхні правага сцягна, пярэдняй паверхні левага сцягна". Мужчына плануе звяртацца ў Следчы камітэт з заявай, каб прыцягнуць да адказнасці тых, хто яго збіў. Таксама ён хоча абскардзіць пастанову суда, які прысудзіў яму 12 сутак арышту.

Журналісты TUT.BY выслалі гэтае відэа ў ГУУС Мінгарвыканкама і Генеральную пракуратуру.

Наталля Ганусевіч, афіцыйная прадстаўніца сталічнай міліцыі, заявіла: "Мы не маем права каментаваць дзеянні сваіх супрацоўнікаў". 

Генпракуратура ад каментароў адмовілася.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.