Місія Еўрапейскага саюзу адкрыецца ў Мінску

Журналісты “Еўрапейскага радыё” спраўдзілі інфармацыю наконт адкрыцця ў Беларусі прадстаўніцтва Еўракамісіі. У Інтэрнэце з’явілася інфармацыя пра адкрыццё прадстаўніцтва Еўракамісіі ў Беларусі. Каб спраўдзіць гэтую інфармацыю, карэспандэнты “Еўрапейскага радыё” затэлефанавалі кіраўніку місіі спадару Хольцапфелю, які ўжо знаходзіцца ў Мінску. Ён ласкава пагадзіўся адказаць на некалькі нашых пытанняў.

ЕРБ: Вы можаце пацвердзіць інфармацыю, што ў Мінску адкрыюць паўнавартасную місію Еўрасаюзу? Ці праўда гэта?

Спадар Хольцапфель, кіраўнік місіі: Так, гэта тое, што мы зараз намагаемся зрабіць. Мы ўжо атрымалі папярэднюю згоду ад афіцыйных уладаў.

ЕРБ: Вы ўжо атрымалі дазвол ад Міністэрства замежных спраў Беларусі?

Сп. Хольцапфель: Не, пакуль што ў нас ёсць папярэдняе пагадненне на працяг перамоваў.

ЕРБ: Як доўга працягнуцца перамовы?

Сп. Хольцапфель: Зараз я не магу адказаць на гэтае пытанне, бо толькі заўтра сустракаюся з прадстаўнікамі МЗС. Мне падаецца, што з гэтым пытаннем журналісты павінны звярнуцца менавіта да МЗС.

ЕРБ: Які мандат будзе у Еўракамісіі?

Сп. Хольцапфель: Калі мы дамовімся на адкрыццё місіі Еўрасаюзу, то ў нас будзе больш паўнамоцтваў і мы зможам каардынаваць свае дзеянні непасрэдна з Беларусі, а не з-за яе межаў.

ЕРБ: Як расцэньвае Еўрасаюз адкрыццё місіі ў Беларусі? Як крок беларускіх уладаў насустрач Еўропе? Як спробу ўрэшце пачаць дыялог паміж Еўропай і Беларуссю?

Сп. Хольцапфель: Мы спрабуем адкрыць місію ЕС у Беларусі ўжо доўгі час. У Бруселі ёсць беларуская амбасада, і я лічу, што адкрыццё місіі тут - гэта абсалютна нармальная справа.