На Дзень правоў чалавека Прадстаўніцтва Еўрасаюза пакажа ў Мінску кіно

10 снежня прадстаўніцтва Еўрасаюза ў Беларусі разам з амбасадай Вялікабрытаніі ў Мінску арганізуюць для прадстаўнікоў СМІ паказ мастацкага фільма "Танец з незнаёмцам" (Вялікабрытанія, 1985 г.). Ён расказвае гісторыю Рут Эліс – апошняй жанчыны, пакаранай смерцю ў Вялікабрытаніі ў 1950-я гады.
Кінапаказ прымеркаваны да Міжнароднага дня правоў чалавека 10 снежня. Пасля кінапаказу адбудзецца прэс-канферэнцыя з удзелам Амбасадара Вялікабрытаніі ў Мінску Розмары Томас і Часовага Паверанага ў справах ЕС у Беларусі Жана-Эрыка Хольцапфеля.

Кінапаказ ладзіцца ў рамках сумеснай выставы Прадстаўніцтва ЕС і Савета Еўропы “Смерць – гэта не правасуддзе”. Яна праходзіць у Беларускім дзяржаўным музеі гісторыі Вялікай Айчыннай вайны.