Надзея Ермакова: Мы за расійскім рублём не пабяжым
Нацбанк не плануе дэвальваваць беларускі рубель услед за расійскім.
Пра гэта старшыня праўлення Нацбанку Надзея Ермакова заявіла журналістам у суботу, 18 кастрычніка.
Яна адзначыла, што Казахстан, які разам з Беларуссю з’яўляецца сябрам Еўразійскага эканамічнага саюзу, не плануе аслабляць курс нацыянальнай валюты ўслед за расійскім рублём.
“А чаму мы павінны бегчы за расійскім рублём? А раптам ён як золата потым падымецца?” — падкрэсліла кіраўнічка Нацбанку.
На яе думку, шмат спекуляцыяй робіцца вакол тэмы дэвальвацыі расійскага рубля. “Заўтра ён скокне ўгару, дык што, мы будзем услед за ім бегчы?” — сказала Ермакова.
Таксама яна мяркуе, што беларускім экспарцёрам не варта спадзявацца на аслабленне курса нацыянальнай валюты, а падвышаць канкурэнтаздольнасць сваёй прадукцыі за кошт скарачэння выдаткаў і змяншэння яе сабекошту.
Таксама Надзея Ермакова лічыць, што курс беларускага рубля сёння цалкам рэальны і ў будучыні Нацбанк будзе праводзіць плаўную дэвальвацыю, перадае БелаПАН.
