"Нам хоць Захад, хоць Усход ..."
Гэты вершаваны радок з нашумелай кнігі кіраўніка верхняй палаты беларускага парламента Анатоля Рубінава, выглядае на тое, знаходзіць сацыялагічнае пацверджанне.
Пасля прэзідэнцкіх выбараў у Беларусі знізілася колькасць прыхільнікаў інтэграцыі і з Еўрасаюзам, і з Расіяй.
Гэта паказалі вынікі нацыянальнага апытання грамадскай думкі, праведзенага 21-31 снежня 2010 года Незалежным інстытутам сацыяльна-эканамічных і палітычных даследаванняў (НІСЭПД).
Сайт НІСЭПД паведамляе, што "на гіпатэтычным рэферэндуме аб уступленні Беларусі ў Еўрасаюз "за" гатовыя прагаласаваць 35,3%, а "супраць" — 40,6%". У кастрычніку гэтыя суадносіны складалі 42,1% і 32,5%.
А "на рэферэндуме аб аб'яднанні Беларусі і Расіі" "за" прагаласавалі б 29,8%, "супраць" — 46,9%. Дадзеныя кастрычніка — 32,3% і 45,3%.
