"Пагоня" стала называцца "палком спецыяльнага прызначэння"

"Пагоня" стала называцца "палком спецыяльнага прызначэння". Пра гэта напісаў у Telegram яго ўдзельнік Вадзім Пракоп'еў. Паводле яго слоў, падраздзяленне прайшло "цяжкі шлях станаўлення".

"Мы павольна, але ўпэўнена працягваем ваеннае будаўніцтва, — піша Пракоп'еў. — Мы добра разумеем нашу галоўную місію. У нас вельмі вялікія мэты. Мы ні на секунду не забываліся навошта мы тут, на ўкраінскай зямлі. Свабода Украіны дае шанец і свабодзе Беларусі".

"Пагоня" "з мэтай максімальнага пашырэння свайго патэнцыялу і павышэння эфектыўнасці запрашае да партнёрства патрыётаў-прадстаўнікоў бізнесу".

Полк пачаў фармавацца ў сакавіку ў складзе Інтэрнацыянальнага легіёна Узброеных сіл Украіны. Нядаўна стала вядома, што першая група байцоў "Пагоні" падпісвае кантракты з Сіламі спецыяльных аперацый Украіны. Ім было паабяцана, што калі яны набудуць неабходны досвед, спецназаўцаў збяруць у адно беларускае падраздзяленне.

На баку Украіны ўжо некалькі месяцаў ваюе беларускі полк (былы батальён) імя Кастуся Каліноўскага.