Прэзідэнт Македоніі ініцыяваў свой імпічмент
Прэзідэнт Рэспублікі Македонія Гёрге Іванаў заклікаў парламент пачаць працэдуру імпічменту. Прычынай ён назваў сваю пазіцыю наконт змены назвы дзяржавы, перадае ТАСС.
Свой зварот Іванаў адрасаваў прэм'ер-міністру Зорану Заеву і большасці дэпутатаў парламента. Ён заявіў, што нязгодны з дамовай паміж Грэцыяй і Македоніяй, якая мяняе назву краіны.
Заява Іванава прагучала адказам на папярэднія заявы Заева ў інтэрв'ю СМІ. Кіраўнік урада паведаміў, што калі прэзідэнт блакуе пагадненне з Грэцыяй, то парламенцкая большасць можа пачаць яго імпічмент.
Як вядома, Грэцыя адмаўлялася прызнаваць за Македоніяй гэтую назву, бо яна супадае з найменнем паўночнай грэчаскай вобласці. Афіцыйныя Афіны патрабавалі змены назвы суседняй краіны і выступалі супраць яе ўступлення ў Еўрасаюз і NATO. У нядзелю міністры замежных спраў Грэцыі і Македоніі падпісалі пагадненне, згодна з якім былая югаслаўская рэспубліка атрымлівае назву Рэспубліка Паўночная Македонія.
