Прэзідэнту Ізраіля ўручылі беларускае пасведчанне пра нараджэнне
Урачыстая цырымонія адбылася 15 ліпеня.
Дакумент пацвярджае, што Шымон Перас з'явіўся на свет 2 жніўня 1923 года на беларускай зямлі ў вёсцы Вішнева, паведамляе БЕЛТА.
Памятнае пасведчанне пра нараджэнне Шымону Перасу ў рэзідэнцыі кіраўніка ізраільскай дзяржавы ўручыў прадстаўнік беларускага МЗС Ігар Ляшчэня. Раней на працягу шасці гадоў ён узначальваў беларускае дыпламатычнае прадстаўніцтва ў Ізраілі.
Падчас сустрэчы з Перасам Ляшчэня падкрэсліў, што прэзідэнта Ізраіля заўсёды рады бачыць на яго малой радзіме.
Выдача памятнага пасведчання пра нараджэнне стала адным з мерапрыемстваў, арганізаваных у Беларусі ў сувязі з 90-годдзем славутага земляка. Нагадаем, што 29 траўня ў Вішневе ў прысутнасці дачкі Пераса Цвіі Вальдэн адкрылі памятную шыльду на хаце, у якой нарадзіўся і вырас прэзідэнт Ізраіля.
Фота — ria.ru
