Расійскія кампаніі плануюць паставіць у Беларусь у красавіку 1 млн тон нафты

Расійскія нафтавыя кампаніі падалі на красавік заяўкі на дастаўку ў Беларусь каля 1 мільёна тон нафты. Праўда, маршрутных даручэнняў на пастаўку дагэтуль няма, паведаміў афіцыйны прадстаўнік кампаніі "Транснафта" Ігар Дзёмін.

Па яго словах, якія перадае БЕЛТА, у красавіку расійскія кампаніі плануюць паставіць 633 тысячы тон на Мазырскі НПЗ і 375 тысяч тон — на наваполацкі "Нафтан". 

Дарэчы, Беларусь плануе захаваць таксама танкерныя пастаўкі праз Клайпеду і Адэсу. 

Ад 1 студзеня буйныя расійскія нафтавыя кампаніі адмовіліся пастаўляць сыравіну ў Беларусь. Прычына ў тым, што афіцыйны Мінск захацеў адмовіцца ад прэміі расійскім нафтавікам у ранейшым памеры. З 4 студзеня пастаўкамі нафты занялаіся група кампаніяў Міхаіла Гуцарыева "Сафмар". Потым Беларусь дамовілася наконт паставак з невялікімі расійскімі вытворцамі, а таксама з Азербайджанам. 

Пакуль што беларускія НПЗ працуюць на 50-адсоткавай загрузцы магутнасцяў.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.