Akute зрабілі кавер на “Як на далоні” гурта Ulis (відэа)
Лідар гурта Раман Жыгараў кажа, што гэта яго ўлюбёны твор у рэпертуары беларускай рок-легенды.
“Гэтая песня ўтрымлівае вельмі глыбокі тэкст, і ў ёй ёсць шаманскі біт, шаманскі рок-н-рольны заварот, які мы адчуваем. Я проста вырас на гэтым, і можна сказаць, што з гэтага расце Akute. “Улісаўскі” адбітак можна ўбачыць на ўсёй творчасці Akute: на першым, на другім альбоме. І нават тое, што мы робім зараз — гэта таксама след Ulis”.
Песня “Як на далоні” увайшла ў альбом "Уліса" "Танцы на даху" 1993 года. Свой варыянт кампазіцыі Akute выканалі на цырымоніі ўручэння ўзнагарод Ultra-Music Awards. Музыкі не выключаюць, што яшчэ неаднойчы звернуцца да класікі Ulis.
