Альбомы “Прэс Фота Беларусі 2011” прызналі экстрэмісцкімі

Судовы працэс быў ініцыяваны Упраўленнем КДБ па Гродзенскай вобласці яшчэ зімой. Мінулай восенню фатографы Юлія Дарашкевіч, Вадзім Заміроўскі і Аляксандр Васюковіч паспрабавалі ўвезці 41 асобнік альбома з Літвы, дзе ён друкаваўся. Нягледзячы на тое, што раней такія спробы заканчваліся паспяхова (выданне мела ўсе неабходныя мытныя дакументы), памежнікі усе асобнікі альбома канфіскавалі для правядзення разбіральніцтва. А пазней перадалі іх у КДБ.

На паседжанні ў Ашмянах 17 красавіка акрамя Дарашкевіч, Заміроўскага і Васюковіча прысутнічала прадстаўніца КДБ Наталля Скурат і кіраўнік Упраўлення ідэалогіі Гродзенскага аблвыканкама Павел Скрабко. Над сваім рашэннем суддзя Давыдаў думаў палову дня. У фатографаў ёсць 10 дзён, каб падаць скаргу на рашэнне Ашмянскага суда.

Рэпартаж з суда - “Шары на лице президента не повышают его популярность”