Арыштаванага Сяргея Каваленку яшчэ і аштрафавалі
Суд прызнаў актывіста КХП-БНФ вінаватым у лаянцы і пакараў яго штрафам на 140 тысяч рублёў (4 базавыя велічыні).
Як паведамляе прэс-служба БХД, сведкі на працэсе блыталіся ў сваіх паказаннях і супярэчылі адно адному. У прыватнасці, адрозніваліся паказанні таго, дзе і калі, нібыта, лаяўся Сяргей Каваленка.
Падчас паседжання да актывіста двойчы выклікалі медыкаў. Нагадаем, што Каваленка ўжо 25 дзён трымае галадоўку ў віцебскім СІЗА. Гэтак ён пратэстуе супраць арышту, які лічыць незаконным. У СІЗА Каваленку змясцілі ў карцар. Прычыны гэтага невядомыя.
