Беларуская пракуратура правярае тэлеканал “Белсат”

Інфармацыя пра чарговую цікаўнасці праваахоўных органаў да працы гэтага тэлеканалу стала вядомая пасля затрымання незалежнага тэлеаператара Алеся Любенчука. На думку прадстаўніка гэтага СМІ ў Беларусі Міхася Янчука, гэта звязана з тым, што ў найбліжэйшы час “Белсат” збіраецца падаваць дакументы на акрэдытацыю. Таму цалкам імаверна, што ўжо загадзя ідзе пошук фармальных падставаў для адмовы.

“Белсат” двойчы падаваў дакументы на акрэдытацыю ў Беларусі — тры і два гады таму. Першая адмова была з фармулёўкай “Пададзеныя дакументы не адпавядаюць заканадаўству”. Другі раз адмовілі ў сувязі з тым, што ёсць шматлікія парушэнні ў дзейнасці журналістаў каналу, якія выявіла менавіта пракуратура. Размова ішла пра працу без акрэдытацыі.

Спадарожнікавае тэлебачанне “Белсат” — гэта першы незалежны тэлеканал у Беларусі. Ён вяшчае з 10 снежня 2007 г. Канал быў створаны як структурная адзінка Польскага тэлебачання, дзе і месціцца афіцыйная рэдакцыя “Белсату”. На тэрыторыі Беларусі канал не мае афіцыйнага статусу, і яго праца абапіраецца на фрылансераў.