Беларусы, памілаваныя Пуціным, вярнуліся на радзіму

Як піша газета Іntex-press, днямі Сяргей Лагун і Аляксандр Чачураў вярнуліся ў Баранавічы. Цяпер яны спрабуюць уладкаваць сваё жыццё і будуюць планы.

"Я ўпэўнены, што нашы ўлады маглі з самага пачатку зрабіць так, каб нас вызвалілі, але не зрабілі, таму не магу сказаць, што я ганаруся тым, што грамадзянін Беларусі, але тым не менш дзякуй хоць бы за тое, што мы выйшлі праз пяць гадоў, а не 14, бо прысуд быў менавіта такім", — кажа Аляксандр Чачураў.

Еўрарадыё неаднаразова паведамляла пра гэтую сітуацыю. Пяць гадоў таму беларусы прывезлі ў Маскву тысячу польскіх таблетак "Тусал" пасля таго, як супрацоўнік расійскай Федэральнай службы па кантролю за абаротам наркотыкаў замовіў іх партыю праз інтэрнэт. Пры гэтым ён прадставіўся аптэкарам. У выніку, хлопцаў затрымалі. У 2007 годзе Сяргей Лагун і Аляксандр Чачураў былі асуджаныя "за кантрабанду псіхатропных рэчываў" на 14 гадоў зняволення кожны. У канцы 2007-га Маскоўскі гарсуд знізіў тэрмін беларусам да 9 гадоў.

За вызваленне аднаго з затрыманых землякамі нават збіраліся подпісы.

Маскоўскі адвакат беларускіх “наркадылераў” Станіслаў Маркелаў (праз некалькі гадоў яго застрэліць кілер) пасля суда заявіў, што гэта была звычайная правакацыя.

Нагадаем, "Тусал" у той час свабодна прадаваўся ва ўсіх беларускіх аптэках, але не быў уключаны ў пералік зарэгістраваных у Расіі прэпаратаў. Гэтыя таблеткі ўтрымліваюць псіхатропнае рэчыва ў малых дозах.

Указ аб памілаванні беларусаў Уладзімір Пуцін падпісаў 30 траўня, напярэдадні свайго афіцыйнага візіту ў Беларусь.

Фота — intex-press.by