"Брэсцкія зубры" сталі трэцімі на кваліфікацыйным этапе Кубка Еўропы
Бейсбольныя спаборніцтвы праходзілі з 30 траўня па 4 чэрвеня ў нямецкім Золінгене.
Як паведамляе БелаПАН, у турніры бралі ўдзел шэсць камандаў: "Літуаніка Каўнас" (Літва), Therwil Flyers (Швейцарыя), Stal B&S Kutno (Польшча), "КНТУ-Кіраваград" (Украіна), Solingen Alligators (Нямеччына) і "Брэсцкія зубры".
Гульні праходзілі па кругавой сістэме. Беларусы выйгралі ў літоўцаў (11:8), палякаў (7:6), швейцарцаў (8:1). Саступілі 3:19 немцам, якія занялі ў гэтым турніры першае месца, і 0:9 — украінцам, якія сталі другімі.
На думку галоўнага трэнера каманды Ігара Лукашэвіча, спартоўцы паказалі годны вынік. Летась на такіх прэстыжных спаборніцтвах брэстаўчане былі чацвёртымі.
Дарэчы, "Брэсцкія зубры" — дзевяціразовыя чэмпіёны краіны па бейсболе і васьміразовыя ўладальнікі Кубка Беларусі па бейсболе.
