Эдуарда Лобава могуць пазбавіць спатканняў з роднымі
Палітвязень 11 студзеня патэлефанаваў з калоніі сваёй маці, Марыне Лобавай.
Ён паведаміў, што яго могуць пакараць пазбаўленнем кароткатэрміновага спаткання, якое яны планавалі на люты. За якое менавіта парушэнне яго могуць пакараць, Эдуард не сказаў.
Як сказала Марына Лобава ў інтэрв’ю Радыё Свабода, гэта можа быць што заўгодна: не туды пайшоў, не там апынуўся, не зашпіліўся, недакладна павітаўся. Маці палітвязня нагадала, што да канца 2012 году на рахунку Эдуарда Лобава лічылася 7 парушэнняў. Як мяркуе жанчына, большасць з парушэнняў сына былі надуманыя.
Эдуард Лобаў адбывае 4 гады зняволення у Івацэвіцкай калоніі па абвінавачанні ў хуліганстве. Яго разам са Змітром Дашкевічам затрымалі за дзень да прэзідэнцкіх выбараў.
