Гурт Wasp'n'Hornet упершыню прэзентаваў сваю музыку
У Мінску адбылася прэзентацыя электроннага квартэта Wasp'n'Hornet. Еўрарадыё пазнаёмілася з музыкамі, сярод якіх аказаўся былы "ляпісавец" Аляксандр Старажук.
Вечарына адбылася ў сталічным рэстаране-казіно West World Club. Рэкламы канцэрту не было і набыць квіткі было немагчыма. Усё з прычыны таго, што музыкі ўпершыню знаёмілі публіку са сваёй творчасцю. Усе госці ўваходзілі на канцэрт выключна па запрашальніках. Усяго ў залі было каля 250 чалавек.
"Сёння быў наш першы канцэрт ў жыцці. Мы робім музыку, пасля здымаем кліпы і нам гэта падабаецца!" — распавядае ўдзельнік гурта Коля Старажук.
"Наколькі мне вядома", — працягвае Старажук-малодшы, — у Віталіка Сідарука (вакаліста гурта — Еўрарадыё) з дзяцінства была мара спяваць. А ў мяне — выступіць на сцэне ў ролі музыкі. А яшчэ ў мяне была адна мара і сёння яна збылася. Я са сваім татам, Аляксандрам Старажуком, так бы мовіць, зліўся на сцэне ў адзінае цэлае. Мы знайшлі, як вырашыць спрадвечную праблему бацькоў і дзяцей".
Поўнае інтэрв'ю з музыкамі з новага калектыву Wasp'n'Hornet можна будзе пачуць у нашым эфіры і прачытаць на старонцы Еўрарадыё.
Гурт у поўным складзе.
Аляксандр Старажук.
Коля Старажук
"Узаемаразуменне ў нас ёсць. І калі ўсё будзе добра, то я збіраюся далей прасоўваць гэты гурт і ўдзельнічаць у ім. Мне ўвогуле падабаецца граць добрую музыку. Неістотна, што гэта. Funk, jazz ці indie. Сёння я граў крыху не ўласцівую для сябе музыку. Напісаў сабе часткі, біты і г.д. ды падглядаў туды." — распавёў Аляксандр Старажук.
