Івана Стасюка асудзілі на 10 сутак
Суд Маскоўскага раёна Брэста прызнаў яго вінаватым у "дробнай хуліганцы"
Як паведаміў грамадскі актывіст, 5 сведак спецназаўцаў і міліцыянтаў блыталіся ў сваіх паказаннях. Аповед Івана Стасюка і ягонай сведкі — дзяўчыны Вікторыі — цалкам супадае, але суддзя Таццяна Міранюк не прызнала яго праўдзівым. На рашэнне не паўплываў і той факт, што маладыя людзі не мелі часу ўсё загадзя абмеркаваць з-за ізаляцыі абвінавачанага з часу затрымання.
Таксама сваімі ўражаннямі па пасяджэнні падзяліўся праваабаронца Раман Кісляк:
"Бачна, што справа сфабрыкаваная і яе асноўная мэта — пазбавіць удзелу Стасюка ва ўчорашняй акцыі на плошчы Леніна. Узніклі шмат праігнараваных пытанняў і працэсуальных памылак. Напрыклад, па другой справе ўвогуле адсутнічае пратакол затрымання. Калі б справа не была палітычнай, яе трэба было адаслаць на пераапрацоўку".
Нагадаем, спецназаўцы затрымалі хлопца 14 чэрвеня і абвінавацілі ў нецэнзурнай лаянцы. Стасюка мелі судзіць 15 чэрвеня, але перанеслі пасяджэнне на 20 чэрвеня. Не паспеў ён пакінуць пастарунак РАЎСа, як на яго склалі другі пратакол, нібыта зноў за брыдкаслоўе.
