Лукашэнка: мы не супраць, што БАТЭ зарабляе
Кіраўнік дзяржавы даручыў сфармаваць падыходы па справядлівай ацэнцы працы ў клубах па гульнявых відах спорту ў залежнасці ад вынікаў.
У аўторак прайшла нарада, прысвечаная мерам дзяржаўнай падтрымкі спартыўных арганізацый.
Шмат увагі надавалася заробкам спартсменаў. Аляксандр Лукашэнка адзначыў, што нелагічна, калі клубы атрымліваюць бюджэтную падтрымку, маюць льготы і пры гэтым плацяць вельмі вялікія заробкі. Ён заклікаў вызначыць і выраўняць фонд заробкаў.
"А калі мы наагул не абмяжуем гэтыя апетыты ў заробках, не прывязаўшы іх да чагосьці, мы будзем незразумела на што гэтыя грошы траціць", — цытуе словы кіраўніка дзяржавы БЕЛТА.
Ён нагадаў, што найбольшыя заробкі атрымліваюць хакеісты і футбалісты, а "вынік амаль адваротны".
Старшыня Беларускай федэрацыі футбола Сяргей Румас прывёў прыклад БАТЭ. Калі б не грошы, якія клуб зарабіў за выступы ў Лізе чэмпіёнаў, то заробкі ў камандзе былі б у тры разы меншыя.
На гэта Аляксандр Лукашэнка адзначыў: "Мы і не гаворым пра тое, што зарабілі за мяжой, і пра тое, што даў прыватнік. Калі ласка, БАТЭ гэта зарабіў. Толькі трэба пры гэтым не забываць, што ёсць матэрыяльная база і дзіцяча-юнацкія спартыўныя школы — крыніца далейшага росту ў БАТЭ. Таму гэта таксама трэба бачыць. Але мы не супраць, няхай БАТЭ зарабляе".
Лукашэнка заклікаў стварыць роўныя ўмовы, а ўзровень заробкаў мусіць залежаць ад вынікаў, падкрэсліў ён.
