Лукашэнка не хоча, каб апазіцыя байкатавала выбары
Байкот парламенцкіх выбараў апазіцыя робіць у інтарэсах замежных сілаў, заявіў кіраўнік Беларусі.
Па яго словах, якія перадае interfax.by, сапраўдная апазіцыя мусіць да канца змагацца за ўладу, за інтарэсы народа. Хто пойдзе на выбары да канца, той і ёсць сапраўдная апазіцыя, а байкотчыкі — гэта "пятая калона", лічыць Лукашэнка. Пры гэтым ён дадаў, што ў дзеяннях апанентаў улады няма ніякай апазіцыйнасці, а ёсць толькі жаданне перакуліць выбарчы працэс, а то і краіну.
Разам з тым кіраўнік дзяржавы адзначыў, што яму цяпер не да выбараў. Па яго словах, ёсць людзі, якія паспяхова займаюцца выбарнай кампаніяй. А ў яго ёсць больш важныя справы.
Нагадаем, што за байкот выбараў выказаўся аргкамітэт БХД, а Партыя БНФ і АГП агітуюць за байкот і збіраюцца зняць сваіх кандыдатаў перад галасаваннем.
