Марафонец прабег вуліцамі Брэста на знак падтрымкі Алеся Бяляцкага
Людзі віталі спартсмена ў майцы з надпісам “Свабоду Бяляцкаму” і нават далучаліся да прабега.
Бягун-аматар Уладзімір Малей, юрыст прафсаюза Работнікаў Радыёэлектроннай прамысловасці (РЭП), патлумачыў:
“Сёння, 4 жніўня, праводзіцца Міжнародны Дзень салідарнасці з праваабарончым рухам у Беларусі. У Беларусі парушаюцца правы чалавека. За кратамі, у турмах знаходзяцца 14 палітзняволеных. Сярод іх і праваабаронца Алесь Бяляцкі. Я вырашыў прабегчы вуліцамі Брэста і такім чынам выразіць сваю салідарнасць з праваабаронцамі”.
Ля помніка 1000-годдзю Брэста да спадара Малея далучылася дзяўчына. Потым яна і сяброўкі сфатаграфаваліся з бегуном на памяць.
Акцыя доўжылася каля паўгадзіны. Праваахоўнікі не ўмешваліся.
