Маскоўскім пратэстоўцам распавялі пра барацьбу супраць Лукашэнкі (фота)

Колькасць людзей, якія ўдзельнічаюць у пратэстах, працягвае павялічвацца. У лагеры стварылі ўласную дружыну, якая сочыць за парадкам і перашкаджае правакацыям.

Смецце з тэрыторыі лагера збіраюць валанцёры. У лагеры дзейнічае "сухі" закон. Тым, хто прыходзіць нават з півам (у Расіі яго можна піць на вуліцах), удзельнікі настойліва рэкамендуюць пакінуць тэрыторыю лагера або выкінуць піва ў сметнік.

Днём пад'язджаюць студэнты і рыхтуюцца да вучобы на месцы. Можна сустрэць людзей з падручнікамі, а таксама з Правіламі дарожнага руху.

Дзейнічае лекторый для пратэстоўцаў. Прачытаць лекцыю ў ім можа любы ахвочы, які з'яўляецца спецыялістам у якой-небудзь галіне. Напрыклад, праграма лекторыя на 12 траўня такая:

1. Уводзіны ў міжнародную мову эсперанта.

2. Семінар "Што рабіць пры затрыманні".

3. Сацыяльныя карані эканамічных праблем.

4. Сустрэча з удзельнікам "Occupy WallStreet"

5. Лекцыя "Бунт ці рэформа".

6. Страйк у Калузе (досвед працоўнага супраціву)

7. Гісторыя грамадзянскага непадпарадкавання ад Сакрата да Марціна Лютара Кінга.

8. Сартаванне і ўтылізацыя смецця.

9. Тахрыр. Як перамаглі Мубарака

10. Досвед барацьбы супраць Лукашэнкі.

У ноч на суботу ў лагеры было каля 500 чалавек. Чакаецца, што на выходныя іх будзе больш. Нагадаем таксама, што 13 траўня група пісьменнікаў і музыкаў запланавала "Кантрольны шпацыр" — ад помніка Пушкіна на Пушкінскай плошчы да помніка Грыбаедаву на пачатку Чыстапруднага бульвара. Пра свой удзел у акцыі ўжо заявілі Барыс Акунін, Андрэй Макарэвіч, Дзмітрый Быкаў, Аляксей Кортнеў ды іншыя.