Новым амбасадарам Украіны ў Беларусі можа стаць экс-міністр абароны
Украіна накіравала ў Беларусь запыт на атрыманне папярэдняй згоды на прызначэнне Міхаіла Ежэля новым амбасадарам у нашай краіне.
Пра гэта паведамляюць украінскія СМІ, якія спасылаюцца на высокапастаўленую крыніцу ва ўкраінскім урадзе.
Як вядома, на дадзены момант месца надзвычайнага і паўнамоцнага амбасадара Украіны ў Беларусі вольнае. 26 лістапада 2012 года прэзідэнт Віктар Януковіч звольніў з гэтай пасады Віктара Ціханава, у сувязі з абраннем яго народным дэпутатам Вярхоўнай Рады ў кастрычніку мінулага года.
Міхаіл Ежэль з сакавіка 2010 года да лютага 2012 года займаў пост міністра абароны Украіны. Уся дзейнасць Ежэля на пасадзе кіраўніка Мінабароны суправаджалася карупцыйнымі скандаламі, адзначае ZN.UA.
