Сайту псеўданавінаў NewsBelarus.net — 2 гады

Іншыя медыі прынялі некаторыя такія “навіны” усур’ёз, што, на думку аднаго са стваральнікаў сайта Рыгора Пятровіча Белкі, кажа пра стаўленне да Беларусі як да краіны, у якой можа адбыцца ўсё, што заўгодна. Напрыклад, сайты газеты “Московский комсомолец” і радыёстанцыі “Эхо Москвы” перадрукавалі ў сябе артыкул пра тое, што форвард зборнай Францыі па футболе Франсуа Рыберы памяняў у мінскім аэрапорце грошы па 5 тысяч за 1 еўра. Нікога не здзівіла і тое, што футбаліст вырашыў тут жа запытацца ў журналістаў, дзе ў беларускай сталіцы самыя танныя прастытуткі.

“NewsBelarus.net дэканструюе палітычны і сацыяльны дыскурс Беларусі. Мы бярэм рэальныя навіны і робім на іх падставе свае на той жа мове, карыстаючыся тым жа стылем, тымі ж вобразамі і структурамі, але разбураючы сэнс. Гэта дазваляе паглядзець на рэальныя навіны крытычна”, — фармулюе творчую канцэпцыю рэсурса рэдактар сайта Валера Асіпчык.

На Дзень народзінаў каманда NewsBelarus.net зрабіла сабе падарунак, і... праплаціла даменнае імя яшчэ на адзін год.

Сайт працягне сваё існаванне ў звыклым выглядзе. Магчыма з’яўленне новых рубрык, але якіх — не ведаюць пакуль што нават самі стваральнікі NewsBelarus.net.