Самалёты для прэзідэнтаў: Беларусь саступае Расіі, але абышла Украіну

Падчас прэс-канферэнцыі 15-га студзеня ў Аляксандра Лукашэнкі пацікавіліся, навошта яму такі дарагі самалёт (пытанне задаў журналіст Радыё "Свабода”).

У спальні прэзідэнцкага "Боінгу"

Нагадаем, эксклюзіўна аздоблены Boeing 767-32K(ER), які раней належаў Туркменбашы, быў выкуплены для кіраўніка Беларусі. У СМІ праходзіла неправераная інфармацыя, што яго цана — ад 124 мільёнаў долараў.

Падчас прэс-канферэнцыі прэзідэнт назваў іншую суму: менш за 100 мільёнаў долараў.

Аляксандр Лукашэнка: “А такі новы самалёт каштуе 250–300 мільёнаў пад кіраўніка дзяржавы. Самалёты танна не каштуюць. І каб вы ведалі, у прэзідэнта самалёт — 3-5 гадоў, і яго мяняюць. Туркменскага боку самалёт мы купілі для таго, каб зэканоміць. Паколькі новы ў 2,5 разы даражэйшы за той, што прадаў нам туркменскі бок”.

З 2004 года ў Нацыянальным аэрапорце быў запаркаваны эксклюзіўны Boeing 737-8EV(BBJ2). Кошт, паводле некаторых дадзеных, складаў не менш за 100 мільёнаў долараў. 

Фота Марцэля Холя

Самалёту, які раней у журналісцкіх колах называлі “прэзідэнцкім”, на дадзены момант усяго 11 гадоў. Адзіная праблема — далёкасць пералёту. Трапіць на ім з першай спробы ў Лацінскую Амерыку, напрыклад, немагчыма. Неабходна дазапраўка. Таму, відаць, і наспела патрэба ў “Боінгу" Туркменбашы.  

Цікавімся, якія самалёты дазваляюць сабе прэзідэнты з суседніх краін.

Кіраўнік Расіі карыстаецца айчынным Іл-96 2004-га года выпуску. Праўда, начынка “Ілюшына” зроблена з алігархічным размахам: пазалота на сантэхніцы, каштоўныя камяні на сценах, дызайнерская мэбля. У самалёце ёсць абсталяванне для кіравання ўзброенымі сіламі. Кошт самалёта, згодна з некаторымі ацэнкамі, дасягае 300 мільёнаў долараў.

Паводле афіцыйнай інфармацыі, прэзідэнт Украіны Віктар Януковіч карыстаецца Airbus А-319-115-XCJ (кошт склаў 86 мільёнаў долараў, менш, чым у беларускага калегі). Такі ж самалёт сабе дазволілі прэзідэнты многіх іншых краін: Францыі, Бразіліі, Нямеччыны…

Праўда, ходзяць чуткі, што Віктар Януковіч замахнуўся на новы, больш раскошны апарат. Кіраўнік прэс-службы ўкраінскага прэзідэнта Дар’я Чапак не пацвердзіла і не абвергнула Еўрарадыё гэту інфармацыю.

Памочнік дэпутата Рады Віктара Януковіча-малодшага, з якім мы звязваемся,  ніколі не быў усярэдзіне прэзідэнцкага лайнера.

Памочнік Дзяніс: “А што тычыцца народнага дэпутата Віктара Віктаравіча Януковіча, у яго няма асабістага самалёта. Больш за тое, ён у асноўным карыстаецца падчас пералётаў эканом-класам”.

Але па-сапраўднаму ўражвае, як ставяцца да “прэзідэнцкіх” самалётаў нашы прыбалтыйскія суседзі.

“У Латвіі папросту няма спецыяльнага самалёта для прэзідэнта, — здзіўляюць Еўрарадыё ў канцылярыі прэзідэнта Латвіі Андрыса Берзіньша. — Не можам сказаць, якімі самалётамі прэзідэнт карыстаецца. Гэта залежыць ад канкрэтнай краіны, куды яму трэба ляцець”.

Берзіньш карыстаецца звычайнымі камерцыйнымі авіялініямі, лятаючы разам са звычайнымі пасажырамі. У выпадку візіту за межы Латвіі арандуецца цэлы самалёт.

“Спецсамалёта ў прэзідэнта рэспублікі няма”, — гэтак жа паведамляе Еўрарадыё прэс-служба літоўскай прэзідэнцкай канцылярыі. 

Даля Грыбаўскайтэ, як і кіраўнік Латвіі, аддае перавагу звычайным пасажырскім самалётам.

Пасля трагедыі пад Смаленскам, калі загінуў прэзідэнт Качыньскі, усе найвышэйшыя дзяржчыноўнікі Польшчы карыстаюцца самалётамі мясцовай авіякампаніі LOT.