Сейм Польшчы прыме рэзалюцыю па Беларусі
"Рашуча патрабуем ад беларускіх уладаў неадкладнага вызвалення ўсіх арыштаваных і спынення палітычных рэпрэсій", — гаворыцца ў праекце рэзалюцыі.
Як заявіў у інтэрв'ю агенцтву РАР намеснік старшыні камісіі па замежных справах Сейма Польшчы Роберт Тышкевіч, праект узгоднены з прэзідыумам Сейма і, па ўсёй верагоднасці, рэзалюцыя будзе прынятая 25 лютага без галасавання.
Па словах Тышкевіча, адбывацца гэта будзе ва "ўрачыстай атмасферы" з удзелам прадстаўнікоў беларускай дэмакратычнай апазіцыі.
У праекце дакумента гаворыцца аб салідарнасці Сейма з тымі, хто змагаецца за дэмакратычную будучыню Беларусі: "Вы ніколі не застанецеся адны ў сваёй барацьбе. Сейм рашуча выступае за дыпламатычныя санкцыі і адначасова за прадастаўленне ўсіх магчымасцяў грамадзянам Беларусі, якія дае ЕС".
Рэзалюцыя заклікае парламенты краін ЕС і Еўрапарламент ажыццявіць рэальныя дзеянні, скіраваныя на падтрымку грамадзянскай супольнасці Беларусі.
