Супрацоўнікі беларускай амбасады ў Варшаве прыбіраюць знічы
Два чалавекі прыбралі знічы ў памяць аб растраляных Кавалёве і Канавалаве, а потым зайшлі на тэрыторыю амбасады.
Пра гэта Еўрарадыё распавёў моладзевы актывіст Ігар Шчэкарэвіч.
Ігар Шчэкарэвіч: "Калі я падыходзіў да амбасады, то здалёк убачыў як малады чалавек нахіляецца над агароджай амбасады. Спачатку я падумаў, што ён кладзе зніч. Выглядаў ён неафіцыйна і ў адной руцэ ў яго быў поліэтыленавы пакет. Каля яго стаяў яшчэ адзін, трохі старэйшы чалавек. Пасля гэтыя двое мужчын зайшлі на тэрыторыю амбасады. Па дарозе больш старэйшы мужчына падняў з зямлі яшчэ нейкую таблічку, але што на ёй было напісана я здалёк не заўважыў. Калі ж я падышоў да агароджы амбасады, то ўбачыў, што хлопец за агароджай трымае ў руках пакет у якім знаходзіцца каля 10 знічаў. Каля ж амбасады знічоў больш не было".
Нагадаем, што 18 сакавіка карыстальнікі сацыяльных сетак заклікалі ўсіх жадаючых запаліць каля беларускай амбасады ў Варшаве знічы ў памяць аб пакараных смерцю хлопцах, асуджаных за тэракт у мінскім метро, каб выказаць салідарнасць з сем'ямі растраляных.
Перад гэтым, 17 сакавіка стала вядома пра выкананне прысуду ў дачыненні да Уладзіслава Кавалёва і Дзмітрыя Канавалава - фігурантаў справы аб тэракце ў мінскім метро.
