Сям'і Кавалёвых з СІЗА КДБ аддалі рэчы Уладзіслава, але не грошы
Рэчы віцябляніна, пакаранага па справе пра выбух у мінскім метро, сям'і пераслалі пасылкай.
Як паведамляе БелаПАН, у пасылцы — рэчы Уладзіслава Кавалёва, прадукты, якія сям'я яму перадавала, у тым ліку яшчэ ў снежні: сухарыкі, алей, гарбата, кава, незапоўненыя паштоўкі з днём нараджэння і да 8 Саквіка, пустая жоўтая тэчка. Яе абвінавачаны ў саўдзеле ў тэрарызме меў пры сабе на кожным паседжанні суда і перыядычна рабіў нейкія запісы. У пасылцы не было лістоў і фатаграфій.
Па словах маці, Любові Кавалёвай, 11 сакавіка, калі яна і яе дачка Таццяна апошні раз сустракаліся з Уладзіславам, у яго мусіла быць каля 450 тысяч рублёў. Пасля сустрэчы сваякі пералічылі асуджанаму яшчэ 200 тысяч на набыццё кніг. Пра лёс гэтых грошай маці Кавалёва пакуль нічога не вядома.
