У Бангладэш чакаюць, што Беларусь інвестуе мільярд долараў
Пра гэта паведамляюць СМІ далёкай азіяцкай краіны.
“Беларускі ўрад можа выдзеліць інвестыцыі на суму мільярд долараў”, — піша выданне The Dailystar.
Мяркуецца, што грошы пойдуць у сельскую гаспадарку, жывёлагадоўлю, гатовую прадукцыю, прадукты харчавання і лёгкую прамысловасць краіны.
“Дэлегацыя Беларусі выказала цікавасць да выкарыстання патэнцыялу краіны ў галіне вытворчасці і захавання малака ды малочных прадуктаў, завода сухога малака, а таксама вытворчасці прадуктаў харчавання буйной рагатай жывёлы, ветэрынарных і медычных прэпаратаў для птушак”, — перадае The Daily Star словы сакратара аддзела развіцця сельскай гаспадаркі і кааператываў Міхір Канці Маюмдэр.
Тым часам міністр мясцовага самакіравання развіцця сельскіх раёнаў Джагандзір Кабір Нанок лічыць, што “супрацоўніцтва з беларускім урадам паскорыць эканамічнае развіццё Бангладэш”.
Варта адзначыць, што ў беларускую дэлегацыю сярод іншых уваходзілі амбасадар нашай краіны ў Індыі Віталь Прыма, а таксама генеральны дырэктар Слуцкага сыраробчага камбіната Анатоль Сцяцко.
