У Беларусь не пусцілі літоўскіх журналістаў
Каманда літоўскай тэлевізіі LTV у сераду ехала ў Гродна.
Журналістцы Руце Ланкінінкайтэ на мяжы паведамілі, што яна непажаданая ў краіне асоба і яе віза анулёўваецца.
Як інфармуе партал DELFI, літоўцы хацелі зрабіць тэлесюжэт, як жывуць беларусы ва ўмовах інфляцыі. Памежнікі заявілі журналістцы, што акрэдытацыя яе сапраўдная, а віза анулёўваецца. Высвятляць сітуацыю журналістцы параілі ў Мінску.
Пра сітуацыю Ланкінінкайтэ паведаміла літоўскай амбасадзе ў Беларусі.
Журналістка працуе ў Беларусі амаль шэсць гадоў. Штогод яна адна з аператарам Ёнасам Грышконісам атрымлівала службовыя візы і гадавыя акрэдытацыі, якія дазваляюць наведваць нашу краіну.
