У Мінску правяраюць інфармацыю пра самалёт — парушальнік мяжы
Паводле літоўскіх крыніцаў, вайсковы самалёт МіГ-29 парушыў дзяржаўную мяжу і заляцеў у паветраную прастору Літвы.
Начальнік прэс-службы Мінабароны Сяргей Кузьмянкоў заявіў агенцтву "Інтэрфакс-Захад", што гэтая інфармацыя правяраецца. Ад іншых каментароў Мінабароны пакуль адмаўляецца.
Нагадаем, што літоўскія СМІ паведамілі пра парушэнне паветранай прасторы Літвы беларускім самалётам 18 красавіка каля 13-й гадзіны. Амбасадзе Беларусі з гэтай нагоды ўручылі дыпламатычную ноту.
Паведамляецца, што інцыдэнт адбыўся над вёскай Пагаранда Варэнскага раёна. Над тэрыторыяй Літвы беларускі самалёт прабыў каля дзвюх хвілін.
Дарэчы, гэты інцыдэнт супаў з візітам прэм'ера Беларусі Міхаіла Мясніковіча ў Літву.
Фота — topwar.ru
