З Украіны ў Беларусь кантрабандай вязуць мяса
Дзве групы нелегальных перавозчыкаў ялавічыны затрыманыя ўчора ў Брэсцкай вобласці.
На трасе "Маларыта — Кобрын" памежнікі сумесна з супрацоўнікамі падатковай інспекцыі спынілі аўтамабіль, у якім двое грамадзян Украіны перавозілі 23 ялавічныя тушы вагой амаль 830 кілаграмаў.
У гэты ж дзень брэсцкія памежнікі затрымалі яшчэ дзве машыны з украінскімі нумарамі. Двое жыхароў Тамашоўкі знаходзіліся ў памежнай паласе без дазвольных дакументаў. Пры даглядзе ў адным з аўтамабіляў выяўлена 16 туш ялавічыны. Як растлумачыў памежнікам адзін з затрыманых, гэтае мяса ён знайшоў у лесе.
Ёсць падставы меркаваць, што ўсе мяса было незаконна завезена на тэрыторыю Беларусі з Украіны, піша "Брестская газета".
