Свіны грып не пацвердзіўся ў дзвюх расіянак, што прыляцелі з ЗША

Небяспечны свіны грып, які падазравалі ў дзвюх расіянак, якія прыляцелі на радзіму з ЗША, не пацвердзіўся. Пра гэта паведаміў галоўны санітарны лекар Расіі Генадзь Анішчанка. Паводле яго слоў, у жанчын аказалася звычайнае прастуднае захворванне.

РИА “Новости” нагадвае, што на сённяшні дзень выпадкі заражэння свіным грыпам пацвердзілі ўлады ЗША, Велікабрытаніі, Ізраіля, Новай Зеландыі, Канады, Іспаніі, Нямеччыны, Аўстрыі, Швейцарыі, Нідэрландаў, Даніі і спецыяльнага адміністратыўнага раёна Кітаю Сянгана (Ганконга).