Сям’я з Глыбоцкага раёна выйграла ключы ад “прэзідэнцкага дома”

У Глыбокім завяршыўся конкурс "Уладар сяла", які пачаўся яшчэ вясной.  Дзесятак сем'яў, сярод якіх былі як сяляне, так і гараджане, змагаліся  за тытул “уладара сяла” на сямнаццаці этапах.  Ім давялося садзіць бульбу, гатаваць беларускія стравы, выступаць у якасці фотамадэляў, даіць кароў, жыць на хутары, касіць, спаборнічаць у інтэлектуальных гульнях, ды рабіць шмат чаго іншага.

Напрыканцы конкурса ўладары сярпа, зямлі, касы, печы ды іншых сялянскіх прыладаў выйшлі на подыум.

Пераможцамі сталі Маргарыта і Віктар Герасімёнкі з вёскі Ломашы. Нечакана для ўсіх (вядома ж, акрамя арганізатараў конкурсу) стала тое, што пераможцам усё ж такі падаравалі дом! Герасімёнкам уручылі ключы ад катэджу, так званага "прэзідэнцкага доміку".

Сям'я, у якой выхоўваюцца двое дзяцей, мае сур'ёзныя праблемы з жытлом, і дом ім будзе вельмі дарэчы.

Ядвіга Сташэўская, Еўрарадыё, Віцебск