Танней, чым у нас, капучына каштуе ў Турцыі, Польшчы, Малдове і Іспаніі

На сайце movehub.com з’явіўся рэйтынг краінаў паводле індэксу спажывецкіх цэнаў. Гэты індэкс ствараўся на аснове цэнаў на харчовыя прадукты, транспарт, вячэру ў рэстаране і інш.

За аснову ўзяты індэкс спажывецкіх цэнаў у Нью-Ёрку. Ён роўны 100%. Беларусь мае індэкс 50%: гэта значыць, што цэны ў нашай краіне напалову меншыя за нью-ёркскія. Сярод нашых суседзяў на тым жа ўзроўні цэны ў Літве з Латвіяй. Вышэйшыя — у Расіі (каля 60%), ніжэйшыя — ва Украіне і Польшчы (каля 40%). Найвышэйшыя цэны ў Еўропе ў Швейцарыі і Нарвегіі (больш за 110%), найніжэйшыя — у Малдове, Македоніі і Грузіі (менш за 40%).

Рэйтынг Еўрарадыё

З дапамогай найбуйнейшай у свеце базы дадзеных пра гарады і краіны Numbeo Еўрарадыё стварыла свой рэйтынг спажывецкіх цэнаў сярод некаторых краінаў Еўропы.

Індэкс складаецца з сумы 6 паказнікаў: сярэдняя цана 1 кубачка капучына ў рэстаране, сярэдняя цана вячэры ў дарагім рэстаране, сярэдняя цана 1 кг. бульбы на рынку, сярэдняя цана месячнага абанемента на фітнэс, сярэдні тарыф таксі за 1 км, сярэдняя цана рэнты аднапакаёўкі ў цэнтры горада.

У рэйтынг трапілі самыя бедная і багатая краіна Еўропы, некаторыя краіны-суседкі Беларусі, і некаторыя папулярныя турыстычныя краіны для беларусаў.
 

У Беларусі сярэдняя цана кубачка капучына — 2,3 долара. Даражэй толькі ў Германіі (2,8), Францыі (2,8) і Нарвегіі (4,7). Найтаннейшы — у Малдове (1,3 долара) і Іспаніі (1,8 долара).

А павячэраць у дарагім рэстаране нашай краіны каштуе 11 долараў, даражэй толькі ў Францыі (13,2 долара) і Нарвегіі (амаль 20 долараў). Найтаннейшая вячэра — у Малдове (3,9 долара) і Турцыі (4,6 долара).

Найтаннейшы кілаграм бульбы можна набыць у Беларусі (0,3 долара), найдаражэйшы — у Нарвегіі (2,1 долара).

За месячны абанемент на фітнэс у Беларусі давядзецца выдаткаваць 36 долараў. Танней толькі ў Германіі (32,9 долара), Польшчы (31,3 долара) і Малдове (27,6 долара). Даражэй за ўсё ў той жа Нарвегіі (амаль 60 долараў).

Найтаннейшы тарыф таксі за 1 км — у Малдове (0,2 долара) і Беларусі (0,55). У Германіі і Нарвегіі будзе каштаваць амаль 2 долары.

Зняць аднапакаёўку ў цэнтры вялікага горада танней за ўсё можна ў Малдове (209 долары) і Турцыі (293 долары). У Нарвегіі — 1263 долары.

Такім чынам, краінай з найніжэйшымі цэнамі ў нашым рэйтынгу можна лічыць Малдову, з найдаражэйшымі — Нарвегію. Беларусь месціцца ў сярэдзіне рэйтынга паміж Латвіяй і Іспаніяй.

Фота: movehub.com