Турцыя не падтрымае заяўку Швецыі на ўступленне ў NATO — Эрдаган
Падчас акцыі каля амбасады Турцыі ў Стакгольме, 21 студзеня 2023-га / Reuters
Турцыя не падтрымае заяўку Швецыі на ўступленне ў NATO, заявіў прэзідэнт Рэджэп Эрдаган. Падставай для такога рашэння называецца дазволеная ўладамі акцыя са спаленнем Карана каля турэцкай амбасады ў Стакгольме.
"Тым, хто дапусціў здзяйсненне такога бязладдзя перад амбасадай Турцыі ў Стакгольме, не варта чакаць ад нас якой-небудзь прыхільнасці па іх звароце аб членстве ў NATO, — гаварыў прэзідэнт Турцыі. — Калі Швецыя не паважае Турцыю, а таксама рэлігійныя пачуцці мусульман, яна не атрымае ад нас ніякай падтрымкі".
Швецыя і Фінляндыя вырашылі ўступіць у NATO пасля расійскай агрэсіі супраць Украіны. Паскоранага ўступлення не атрымалася, паколькі Турцыя заявіла пра шэраг умоў. Сярод іх — выдача са Швецыі 73 чалавек, якіх у Турцыі абвінавачваюць у "тэрарызме". Аднак выдадзены быў толькі адзін чалавек са спісу. Таму ўжо да акцыі каля амбасады ўлады Турцыі не пагаджаліся падтрымаць заяўку на ўступленне Швецыі ў паўночнаатлантычны альянс.
